الكوكب الأصفر الجميل

كان في ولد ذكي جدًا؛ وكان عنده قوى سحريه، بالظبط زي هاري بوتر. كان دايمًا بيفكر، وكان دايمًا بيجيلوا أفكار عبقرية
في يوم؛ فكرفكرة رائعة: فكر إنه يرسم دايره. وفعلاً رسم دايره كبيره وجميله، وكان فرحان بيها جدًا.
وبعدين فكر: أنا ممكن أعمل إيه بالدايره دية. فكر إنه يعملها قرص تليفون. وفعلاً عملها تليفون؛ واتصل بكل أصحابه، موبايلات وترنكات، مكانش بيدفع فاتورة.
لكن هو لما طلع الجني من الإزازة؛ الجني كان شرير، حول حياته لجحيم.
فجأه: فقد كل قواه السحرية، والدايرة مبئتش شغاله، وكل لما يدوس على الدايره الحكم يحسب عليه فاول؟! كان مستغرب جدًا!!
بأى طول الوقت آعد أدام الدايرة بتاعته، مبيكلمشي حد، ومبيردش على حد: مامته تجيبله اللبن ميشربوش ويعد يبص على الدايره. أتصل بيه ينفضلي - ابن الـ (...) - ويعد يبص على الدايرة...
لحد اما فيوم؛ نزلت مركبه شكلها غريب، وقفت في نص الدايرة، ونزل منها ناس شكلهم غريب ولابسين لبس غريب. مسكوه كتفوه وادوله حقنه كبيره؛ وخدوه لمكان غريب. كل حاجه فيه كانت صفره. الجدران والأبواب - حتى الناس كانوا لابسين لبس أصفر غريب.
في الأول كان خايف،،
لكن بعد كده؛ اتعود على المكان، وحبه. خصوصًا لما آبل هناك كل الناس اللي كان نفسه يئابلهم (نابليون ونيرون وعنتر).
هناك استعاد كل قواه السحرية. وبئا يصلي ويشكر ربنا كتير علشان الناس الطيبين دول إدروا يهربوه من الكوكب الشرير ويودوه الكوكب الأصفر الجميل ده. كمان فرح جدًا لما عرف إن كل أصحابه إدروا إن هما يهربوا من الكوكب الشرير ويروحوا الكوكب الأصفر الجميل.